31/07/07

Resultados de los votos

Eiqui stan los resultados de los vuôssos votos. Fueran 11 purcientos (%) de los visitantes ha pensar que Cicuiro éra an Purtual, y naide pensou que éra an Spaña apesar d'ua grande llona que tenemos y que diç que Cicuiro sta de l'outro llado...
Fueran 44.5 % ha pensar que Cicuiro yê a la dereita quando se bira. Mas quando se bira donde piedo you ? Han ? A la capiella de la Lluç ? Ah si, eilli si ! Al birar a la dereita bai-se pra Cicuiro !!!
Fueran 44.5 % que nun s'angañoran ha pensar que Cicuiro sta nal Praino ! Inda bien !
Al falar dessa pageina, naide pensou qu'eilla éra muy buôna... Mas fuestes 16.5 % ha pensar qu'eilla yê buôna, y 83.5 % ha pensar que nun hai mellor... al que, pra dezir vos la berdade, stou ha ficar tode cunsolado !

28/07/07

Andando an vuôlta de Cicuiro...

Andando an vuôlta de Cicuiro yê algo asparcido cum isso...










La cruç de Costantin

Hai an Costantin ua cruç que ten uas gravuras algo strañas que nun sou capaç d'antander. Essa cruç sta al pie d'aqueilla capiella dal pobo, sabeis quando se ven de Spaña ou de Miranda, llougo a l'antrada, a la squierda.


Yê ua cruç tod'dal qu'hai mas normal, mas eilla ten gravuras, scrituras muy strañas, talveç an Llatin. Yê la unica, pul menos que you saiba, desse tipo, nal Praino.

Eiqui vos deixo ua copia que you fiç de las gravuras, y tamien ua fetugrafie pra verdes cum yê isso. La gravura parece dezir que fui feita an 1729...


Se hai perssonas que saban cum ler isso, you ficarie muy cuntento de saber al que isso todo seguenefica, y esse misterio serie resulvido pur cumpreto !!!






Las gientes de la casa dal pobo !

Las gientes de la casa dal pobo, de la nuôssa casa dal pobo, de l'Açociaçon Cultural Cicuirana, van, venen, uns creçan, outros ponen-se mas viellos... y outros han de vuôlver... outros han de venir ! Sabeis quien son esses ?


Verano 1999


Apesar de star toda strampallada, essa fetugrafie inda yê la mie preferida, acho que fui tirada nal verano de 97...




Quien seran esses ?


Mirai cum son las cousas. L'outro die ancuôntrei, perdidas nal miu cumputador uas fetugrafies que ya you nin dava pur eillas ! Al que... nun sei quien yê que sta alla... solo sei qu'essas fetugrafies fuôran sacadas hai algo mas de uns 10 años... Mas quien seran esses ?
Solo sei dal perro que yê Benfica... Nun sei talveç vos ajude ha ver quien son !

22/07/07

Purmeiro Festival Anternational de Palos an Miranda


Nal die 7 de Jullo (si you sei... ya hai algun tiêmpo, mas se Dius me darie al tiêmpo neçario ya 'l habie feito !)... Si pus anton nesse tal die oucurriu an Miranda al purmeiro Festival Anternational de Paleiteiros, juntando ua grande parte de los paleiteiros Eibéricos, dal Praino anté Ouskadi !

Los que pra mie fuôran mas spetaculares son los de Ouskadi que dançoran cun palos, spadas y scudos ! Muy porreiro !

Açpuis tamien dou pra ver los de Çamora y de la Sanabria que ya s'asparcien mas culos nuôssos. Ua cousa anterssante yê que los paleiteiros Spañolos nun fazen diferenças entre homes y mullieres. Al que amostra qu'al cuntrario de los paleiteiros dal Praino, las danças de los palos an Spaña fuôran recuperadas hai pouco tiêmpo anque las danças dal Praino siempre fuôran cuntinuas, ouriginando ua distinçon antre homes y mullieres.
Spero vuôlver ha ver essa fiesta pa l'año y pa'los outros que veneren !

Eiqui vos deixo alguas fetugrafies de las varias danças que dou pra ver :

Muelas del Pan (Çamora)




Paleiteiras de Miranda



Tabara (Sanabria)

Tabara (Sanabria) cula viella.



21/07/07

La Burracheira

Y NADA MAS !!!



18/07/07

Mirandês nal metro dal Porto, han ?

You sou algo burro, chapuçote, y muy teimoso, pur isso...mas ouvie dezir qu'an Purtual hai ua lliêngua que nun yê Purtuês (!), nin Spañol (inda bien), mas si un llatin mal falado algo mesclado cun Purtuês arcaico.

Houbo anté quien me dixo que éra ouficial essa lliêngua, ouficial an Purtual... Mas anton l'outro die vie nal metro dal Porto versos scritos an Anglês (lliêngua anternational ?) y Galaïco (inda bien) traduzidos an Purtuês, you piedo...Purque ir buscar tan loinge quando hai mismo anriba de las trompas al que nun se vei ?

Ua lliêngua falada pur 8000 pessonas, pessonas que tamien tenan ua llitératura que ya éra antes de Camones y tales outros...

Anton piedo, mas quando yê que se vai ha ver los versos de Manuel Preto, y de los outros nal metro dal Porto, han ?

Arrespondieran-me que nun se sabie ! Bien so éran los pensamientos d'un Françês que se vieno ha perder nun peis que quemeça apenas ha antender...Françês que aparantemiente tamien fala essa tal mescla...cun muita proua !

17/07/07

Eilles inda 'l falan !!!


Fui you burro de pensar que ya nun se falava Sturiano pula Spaña arriba ! Yê que siempre que falei cun giente d'alla siempre me dezien "No ahora todos ablamos Español..." Y pensei que ya nun se falarie Sturiano.

Y solo l'outro die que m'aparece un rapaç nal MSN deziendo-me que yê Sturiano y que querie falar an Mirandês cun migo ! Y assi fui que agora tengo un amigo ne las Asturias !

Podeis eiqui ancuôntrar ua lligaçon palas sues nuôbas an "Pal llado de las Asturias".

Cum al sabeis, la nuôssa lliêngua, al Mirandês, ven dal Sturiano, que fui la purmeira lliêngua néo-llatina de la peninsula Eibérica. Las dues lliênguas son muy asparcidas anqu'al vocabulario yê algo diferente, isso sendo muy normal !

Pra vos dares decuônta que yê muy aspercida cul Mirandês cunvido-vos ha mirar pal vidio esse : http://www.youtube.com/watch?v=WI9ktgmFNdM

Y sabeis eilles tamien tenan ua ter'vizon ! Tenemos que arreglar las nuôssas antenas ha ver se apañamos esse canal !

13/07/07

TV Galizia...Purque si !!!

Agora pur ende a riba nos tamien miramos pa la ter'vizon gallega ! Purquei ? Purque eilles son quaise cum nos...tamien tocan la gaita ! E nos tenemos tamien muitas palavras gallegas ne la nuôssa lliêngua. Un die hai you de ir an Galliza ha falar an Mirandês cu'la giente haber se mos podemos antender, stou ciêrto que si !

L'outro die, stava lendo un llibro que falava de las falas ne las partes frunteiriças de Tras-los-Montes. Nesse llibro (de los años 60) stava alla scrito qu'al Gallego stava ya quaise perdido, y muito mesclado cul Castellano, mas qu'al Mirandês inda stava muy fuôrte y que nun iba ha desaparecer assi tan pronto.





Hoije an die, sta nal cuntrairo... Los Gallegos tenen radio, ter'vizon, y nos cum num somos muitos...uns 8000, num tenemos nada... Al que tenemos yê vergoña de falar Mirandês y yê pur isso que tanto al screvimos !


Lembrase-me ua veç de star ha falar Mirandês c'un rapaz de la Raia... Muito la sue moça se riu de m´ouvir falar assi... Anvergoñado vuôlvie ha falar an Purtuês !!!


Ya falei Mirandês cun Gallegos, Bascos, Andaluzes, Llêoneses, Francêses, y Purtuêses, mas hoije an die, ya yê mui deifiçel pra mie de falar an Mirandês c'un Mirandêses !!! Eiqui sta onde nos cheguemos ! Pur isso srevimos y miramos pa la ter'vizon Gallega... "Ha Marie ! Muda pa la Gallega, que son las horas de los tonechos....qu'isso nun da nada..."

Mirando pra TV Galliza yê quaise cum se miravamos pra un TV Mirandum...

Ha ver ne la gallega : Terras de Miranda y O show dos tonechos.

FC Cicuiro sta de vuôlta !!!


Cum yê cun pobo tan pequeiño cunsigue siempre ganhar todes los jogos tradicionales ? Pus yê, esses son Cicuiranos y ciertamiente los mellores. So yê ver todes los premios que stan pa la casa dal pobo...y las fetugrafies delas eiquipas.

An Cicuiro, hai los siempre que gañan los jogos tradicionales. Anton Cicuiranos, y esse anho qual yê la nuôssa eiquipa ? Los jogos son d'eiqui a dous dies, habeis olvido u'l quei... han ?




Cicuiranos dapredan Mirandês !



Agora isso si yê porreiro ! Hai algun tiempo que anda pu'la casa dal pobo un dicionairo de Mirandês.

An vuôlta de cerbeijas los Cicuiranos miran pa ele todos admirados de ver un libro culas palavra qu'eilles saban tan bien. Dalfin yê un deilles, y nun sei se un die nun venera eiqui tamien ha screvir alguas cousas ! Cunvido tod'la giente ha tener esse dicionario, nun custa nada uns diç ouros, no mas !

Eilles nun paran !

Eilles nun paran !!! Si los blogueiros, nun paran ! Y agora cada veç mas. Nessas ultimas semanas talveç se furmoran uns 5 blogs an Mirandês y deiqui a pouco cada un vai crer tener al sou ! Se cada veç se fala menos Mirandês, parece que cada veç se scrieve mas, se isso puôde ajudar a vuôlver ha falar al Mirandês, anton purque no ! Los nuôbos blogs stan pra ber nal "Nuôbas Mirandêsas" desse blog. PARABIENES !!!

12/07/07

Los paleiteiros Cicuiranos...eiqui venen eilles !


Agora yê tamien diç que... Ouvie dezir pur quien sabe bien dessa cousas que ocuran pur ende, qu'an Cicuiro se furmou hai pouco un nuôvo grupo de paleiteiros. Eilles son d'un tipo algo special, cun forme al que you ouvie... Son un cruzamiento antre los paleiteiros dal Praino, y los de Muelas del Pan, mas so tenan un solo palo y yê muy cumprido.

Mas al que you ouvie dezir eilles dançan an vuôlta d'ua mesa... Y batan culos palos nuas bolas...Si eilles stan bobicos, bobicos pur cumpreto !!!


La palabra de Dius

Un die Dius allevantou-se y dixo assi : Y llougo an'un anstante apareciu la lluç, las streillas, los planetas, los mares, las muntañas, los valles, los animales y los Mirandêses !

05/07/07

Pula raia arriba !

Desta veç vamos eiqui falar dun de los pobos mas bonitos dal praino. An ele mesmo nun ten assi grande cousas d'anterssante... mas an vuôlta, ah ! An vuôlta yê differente ! Al qu'hai ? Al Douro, al douro mius amigos !

Si ya 'l sabeis, vamos ha falar de Paradela ! Anton, pega la chaça y pa llantre ! Vamos alla !

De Cicuiro anté Costantin :

Al salir de Cicuiro tuve que parar para admirar las frolicas de la borda de la strada, alla stavan eillas al rechin dal sol.
Al chegar an Costantin stava un burro que me dou los buônes dies... Açpuis fui-me an casa de tie Albertina ha cumprar ua bolicas d'anis.

Eiqui stan alguas froles de Costantin...




Y eiqui iba you pula stradica arriba an direçon a Paradela...


De Costantin anté Paradela (passando pu'riba de Infainç) :

Ah camino de l'anfinito pur d'onde yê qu'eiras ? Iras anté Aliste... Se vas alla anton trai-me ua Alistana...ha ver...




La chegada a Paradela :


Llougo ancuntrei un amigo miu...

...y açpuis inda me fiç quatros amigos mas, éra bien simpaticos, pus si eilles inda me doren chougarços ha purvar, mas you cum alla sei fazer dixe : "Que Dius vos al pague mas acabei agora de quemer ne la vuôssa casa dal pobo... assi que..."

Y you cum andava a la purcura dal mirandouro... la chibica alla me dixo que tenie you que choubir un camino, passar al pie d'un castañeiro que ya éra dal tiempo de los Afonsicos, i qu'al ver ua cruç pues que éra eillie...anton fui...

A partir deiqui anton yê que fui...Mirai !






Y açpuis... Pues mira tu que me dou la gana d'ir anté Moveiros nal quemercio de Mar !


Ai... las froles dessa tierra son tan guapas...

Alistanas claro... Buôlbie an Cicuiro cuntento de la bida !