Tu vas ? You si...

Samarcus

-Que Dius mos dé buônus diês !

-Buônus diês mus dé Dius home !

-Anton que tal ?

-Catanu !

-Qui'que te passa ?

-Conchu... indagora la mie fui-se a la fuônte y nun sei que xurdiu... partiu la barrila !

-Mira-tu, you sin auga !

-A las vézes sabe-te mas al vinu !

-Si mas agora'l doutor nun me deixa buer muitu ! Y eilla siêmpre me lu sta a repetir ! Ay Dios biên me vou a murrer cu'las gorjas sécas cume un papu !

-Mira, you mañana vou a la Lluç y vénes cu nos. Aton no ?

 

-Se vas al Samarcus aton vou you tamiên. Assi mercu you ũa barrila y açpuis inda vamus a la Jinja que mus ponga polbu y ũa buôna puôsta pra cada un.

-S'oufréces tu aton si !

-Calla-te y buémus ũas pinguitas de vinu que la tie nun me vei eilli !

-Ala anté mañana cumpadre !

 Nuôssa Señora la Lluç an riba'l marcu la frunteira (al marcu ten ũa cruç gravada a la squiêrda'l P)

La Lluç ya yê mañana !

Aquessa feira mas antiga que lus Afonsicus torna mañana nal mesmu sitiu de siêmpre. 

 Fraiteirus a spurmenta las fraitas que se pudiên mercar a la feira

Antre Spaña y Purtual, n'un puntu altu, nun monte que fai raya. Monte que dalguns chaman Samarcus ya d'outrus Lluç pu'lus santus qu'alla staran mañana llougu a la purmañana.

Las bandeiras

Mañana tenereis la frunteira llibre, pudereis fazé'l to'l cuntrabandu que vus agrade. Lus carabineirus ya ende nun stan !

Al Samarcus an 1966

Mas nin siêmpre assi fui cume'l védes ende n'aquesse retratu que ten quaisque 50 añus y que mus deixa vé la çamarra dal carabineiru pousada anriba'l marcu la raya. Y... y la barrila, feita an Mubeirus y que tamiên se pudie mercar eilli. Inda las pudeis mercar mañana !

Que vus agrade, you nun puderei alla star.

HABEMUS FULAR !

Mie mai fizu onte’l fular. Cume de questume fizu-mus ũa bolla einorme, mas grande que lus cantabouçus qu’un die Oscar andubu arrebulcar na Lluç ! Açpuis cume tenémus un fornu eilétricu pus mie mai alla puju la massa n’un canastru que nun yêra mas grande que la fuôlla d’un llibru.

Ala, passadu uns minutus ampeçou a crecer y todu se butou fuôra. Ala, alla vai miu pai a saca la bolla dal fornu. So quandu viu aquillu inda pensou que yêra cume un balde de cimiêntu. Agarrou-te-lu y ala que te lu çpejou n’un canastru un poucu mas grande. 

Mas claru, al fular que tenie la fechadura an baixu, ficou-se pa riba... y quandu mi mai fui a sabé dal fular al diañu la bolla tenie ũa racha de par an par mas funda que las Arribas dal Douru ! Biên vuziorun lus dous. 

 Al fular biên chénu de chicha !

You an quantu, cume sabeis, cun racha ou sin racha, ya qu’al cheiru yêra’l méźmu que siêmpre, agarrei-me a él y nu’l llarguei. Que biên sabe. Un añu sin quemer fular yê de mas...

Un cicuiranu galardonadu nal purmeiru cuncursu Asturica

Tengu muita proua de vus dezir qu’arrecebi un prémiu de lliteratura nal purmeiru cuncursu Asturica. Als prémius furun outurgadus an Storga nal passadu die 1 de Marciu. Nun hei pudidu star alla pr’arrecebi’l prémiu mas fui ũa grande suspréźa de saber la nuticia.

Suspréźa purque pu’la purmeira véç viu-se na lista dals galardonadus un mirandés nal méyu d’outrus falantes de l’asturllionés. Issu fui ũa couźa que you siêmpre quije. Pu’la purmeira véç stabamus ende todus y al fin al cabu al cuncursu permetiu fazer un nuôlu antre las nuôssas cumunidades. Scalla'l purmeiru. Purque dantes cada un ficaba dal sou lladu; mirandéźes cun mirandéźes ya sturianus cun llionéźes.

Nal méyu dals 30 outores que parteciporun, als galardunandus furun lus seguintes :

Pa’las cuôntas :

1º Llobu, Mª José Zurrón del Estal (Çamora)

2º Cartes nel horru, Inaciu Galán y González (Sturias)

3º El Conciertu, Naomi Suárez González (Sturias)

Versus :

1º Naide

2º Al Reinu Maravelloźu Thierry Alves (Tiêrra de Miranda)

3º Escalones d’amor, Irma González- Quevedo Pedrayes (Sturias)

Ũa couźa qu’hai qu’arreparar ende yê que to’lus qu’arrecebirun prémius son nuôvus. La méyor parte cun trinta y tal añus ou anté ménus. Uns son cuinecidus cume Inaciu Galan ou Irma González-Quevedo que scribe an patsuezu y que ye la filla de Roberto González-Quevedo. L’home yê outor d’un llibru (y muitus mas) que ya eiqui vus falei : “Antropologia social y cultural de Asturias”.

Hai tamiên ũa çamorana que gañou’l purmeiru de las cuôntas. Eilla scribiu an senabrés ũa cuônta que se passou nal sou llugar de San Martin de la Castañeda. Llugar biên cuinecidu pra quiên vai a’l llagu.

You dal miu lladu srebi uns versus que falan de Cicuiru un poucu a la maneira dals mius dous outores favoritus que son al Padre Galu y’l Padre Priêtu. Un yêra sturianu y l’outru mirandés de samartinu. Quandu acabei dal screbir staba cuntentu cu’l miu puéma, mas achu que nun ten nada a ver cu’ls de Galu ou Priêtu, nun yê tan buônu.

Çculpai pur solu vus haber dadu la nuticia hoije mas nun me dou tiêmpu pra lu fazer antes. Tamiên querie eiqui agradecer als que tuvirun l’eidéya dal cuncursu, a l’associaçon Faceira que nun deixa quiêtu’l téma dal llionés y que fai muitu pra juntar to'las formas de la nuôssa lliêngua y anfin a la camara de Storga.

 

Anquéritu suôbre l’uźu la lliêngua

Ũa lliênguista la Hungriya fai un anquéritu suôbre l’uźu la lliêngua mirandéźa afuôra la nuôssa tiêrra. Solu puôden partecipar lus mirandéźes que nun vivan ne la nuôssa tiêrra. Yê un anquéritu ampurtante que mus vai a permetir saber quantus somus alla fuôra a falar an mirandés.

Partecipai eiqui.  

La camara de Miranda fai pu’la lliêngua (2)

Mas ũa einiciatiba de la camara y fui pa’l die la lliêngua materna. Criyou-se ũa nuôva fuôlla d’amboras an mirandés que se chama “Çubiaco”. Digu fuôlla, anque nun l’hei vidu, mas nun me paréce ser un jurnal cun muitas paiginas. Mas nun amporta ya que solu saliu’l numaru “zéro” hai dues sumanas yê nurmal que tenga poucas paiginas. Ya s’ira anchindu cu’l tiêmpu, spéru you. Yê ũa fuôlla de graça que sera spargida pu’las Tiêrras de Miranda. Supongu pu’las caźas l pobu y’l restru las anstituçones publicas.

Yê ũa fuôlla anteiramiênte an mirandés y pudeis ya agora vos tamiên partecipar n’eilla screbindu testus an mirandés. Açpuis ya solu teneis que lus mandar pu l’Anternéta eiqui : ccubiaco@gmail.com . La fuôlla sal duês vézes a’l més. Que vus agrade la sue leitura !

La camara de Miranda fai pu’la lliêngua (1)

Que la verdade séya dita, quandu la gente fai couźas buônas tamiên l digu ! Ende teneis un eiźemplu onde paréce que se spertou l’antresse de la camara de Miranda pu’l mirandés. La purmeira couźa yê que fazirun un reclame mui buônu na nuôssa lliêngua pa’l festival dals sabores.

Yê un reclame un poucu amboubadu que fui spargidu pu’l facebook y que la gente gustou muitu. Son retratus de puliticus, zéñus de bandas zeñadas, bunécus, retratus de filmes, … que van acumpañadus c’ũa pequeiña llona méyu bouba. Y todus dizen que quiêren ou que ténen d’ir anté Miranda. Lus mellores son lus retratus cu’lus puliticus. Mui buônus.

Ya eiqui vus deixu lus qu’atupei pu’l facebook. Y parabiênes a quiên lus fizu ya a quiên tubu l’eidéya !

 

 

 

 

 

 

 

 

Castañas pelladas !

Catanu ! Squeci biên méyu kilu de castañas nun recantu la cuzina y agora stan todas pelladas ! Duras cume’l fiêrru ! Dalgun sabe que puderei fazer d’eillas ? An d’outras tiêrras ya vi gente a seca las castañas cun fumu n'ũa chabola pa las cunservar muitu tiêmpu. Y tamiên pareciên star pelladas, so qu’açpuis nun sei cume faziên pa’las puder turnar a quemer...

Ay ! Ya sta loinge’l tiêmpu dal poçu'l tiu Priêtu ! Que diç que botaba pr’alla sacas y sacas de castañas y que se’l guardaban eilli quaisque un añu ! Bah, la gente cuntaba, you nun vi.

Se’l tiu Lérias fusse vivu…

Tenerie ya 111 añus feitus nal die de Reis y cun certéza inda apercie na tervizon purtuéźa cu’la sue guitarra dal llatu. Se fusse vivu lus puliticus la Nuôssa Tiêrra teneriên las oureillas tan grandes d’él puxar pur eillas, que ya naide vutarie n’eilles.

 Tiu Lérias spéru qu'inda mirais pur nos dende d'onde stais !

Habémus taberneiru

... ya taberneira tamiên ! Pus al miu primu Brunu y la sue moça Cristina son lus nuôvus merdomus de l'eigreija bouba. Mudorun bastantes couźas, houbu ũa pintadéla de las parédes y cambiorun-se ũas couźicas pra tener un poucu mas d'animaçon pu'ls seranus. Parabiênes a eilles y anté bréve alla !

Cristina y Brunu ya'l restru la ramboya