Algo d'arquitetura an Costantin

Crie ende vos presentar un pica-puôrta oureginal y ua janelica bien purreira y algo mas ya eides de ver... Essas obras d'arte Mirandêsa pudan ser vistas an Costantin. La mas oureginal acho que yê al pica-puôrta c'ua forma de serpiênte ! Nunca habie you visto un assi. Normalmiente son algo mas simples. Tamien ya fui a ver los pica puôrtas dal llado Alistano an Mubeiros pur'eisemplo, mas éran muy simples y inda menos traballados que los Mirandêses.

Un eisemplo de l'arquitetura Mirandêsa açociada cula religion yê essa janelica bien purreira c'ua cruç nal meio.



Nun hai grande cousa pra dezir suôbre la casa, hoije an die yê un palleiro, anque inda se puôda ver outra cruç pintada nua puôrta. Era pra que las bruxas nun vengan !

Ende ua gravura de la data an que fui feita la casa. Aquesse stilo ancuôntra-se an outros sitios dal pobo mustrando que ciertamiente fui al mesmo pedreiro que las fizo. Mirai quantos arañones nun hai an riba d'essa puôrta ! Quantas vidicas nun habera qu'essa chabola stan sien naide ?

A la salida de Costantin no muy loinge d'ua fuônte se puôde ver essa capellica adonde stan scritos los nomes de las pessonas que la mandoran fazer.

Pur fin, vos amostro ua gravura que quien nunca la viu ficarie muy spantado ! Trata-se d'ua gravura nua antrada d'un cural. Ua parte ya fui apagada purque al que staba alla scrito nun éra cousa de ler.

Mas diç toda la verdade. Alguas pessonas de Costantin faloran-me d'aquisso y deziran-me qu'habie qu'antender al que sta alla scrito algo assi : "cada un trata de las sues cousas y naide se mete ne la vida de los outros".

Mas y anton, al que sta alla scrito ? Pus fui alla screbido an Sturiano ou Mirandês (?) (pensei que fusse Gallego) : "El que digua mal de la obra que se foda y el que digue bien tan bien". La parte an scuro yê la que fui apagada, mas que la memoria dal pobo Costantineiro cunserbou.

Algo subre al "s" antervocalico

Hai uns dies atras publiquei ende alguas cousas subre al "s" antervocalico y la sue prenuncia. Angañei-me dezindo que je prenuncia cum'un "j". No yê algo çfrente mas nun éra capaz de las ver... ou de las oubir.

Por isso pra las ver, pude-s'usar al que se chama um spectrograma. Esse tipo d'analeç amostra las frequencias d'un sinal (nesse caso la mie voç) an funçon dal tiêmpo que bai passando. Las clores dan ua eideia de l'antensidade de las frequencias ou seia dals sones. Quando mas fuôrte, mas burmeillo. Y açpuis vai dal amariello até l'azul pals mas fracos sonidos.

Pra ver las çfrencias prenunciei an frente d'un micro las palabras segientes : "rosa" y "eigreija". Al que se vei agora muy bien yê qual sones de los "sa" y "ja" nun son eiguales, al "ja" tenendo mas sonoridades. Al facto de tener mas sonoridades penso you que resulta de ser "ja" la palatisaçon de "sa". Spero nun me tener angañado desta veç.

Atentado a la cultura Mirandêsa

S'outro die fui feito un atentado a la cultura Mirandêsa ne la terbizon Purtuêsa. Nal programa "gato fedurento" fui apresentado un vidio adonde se fai pouco de la dança de los dançadores Mirandêses y mesmo de la lliêngua Mirandêsa.

Los Amigos de la Lliêngua Mirandêsa pieden que seian feitas çculpas publicas de los outores al pobo Mirandês.

Al vidio sta presente ende : http://www.youtube.com/watch?v=HnBjnPQ7_MM

Uso de la Lliêngua...

Diç quales son las çfrenças y ancuôntra la verdadeira !

Al arrepilado de Cicuiro

Diç que lo viren passar...

Pauliteiro ou Paleiteiro ?

Ya nun yê al purmeiro que diç purque scrivo "paleiteiro" y no "pauliteiro"... Pus simplesmiente purque "pauliteiro" yê ua palabra Purtuêsa que ven de "pau". Y dessa maneira pouco la uso purque ende scrivo an Mirandês...(nun sei se vos destes decuônta !) Quando éra pequerrico you dezie "paleiteiro" y siêmpre disse assi y nunca naide me corregiu ! You aceitei essa palabra cum se fussa Mirandêsa. Y pur'acaso se pensarades bien "paleiteiros" ven de "palicos", cul "i" que passa ha ser "ei" cum an : idade > eidade. Pur isso uso essa palabra !

Protegir ũa lliêngua yê pansar neilla cada die

Al "s" antervocalico yê ende representado pur un "s" cun cedilla.

La Lliêngua Mirandêşa

Quien dirie qu’antre los matos eiriçados,

Las ourriêtas y los rius d’essa tiêrra,

Vivie, como al chougarço de la siêrra;

Ũa lliêngua de sons tan bariados ?

Mostre-se y fala-se essa lliêngua, filla

D’un pobo que ten neilla al choro y ‘l canto !

Nada pur ciêrto mos cautiva tanto

Cum la form’an que l’eideia brilla.

Desgraciado d’aquel, qu’abandunando

La partrie an que naciu, la caşa y ‘l huôrto,

Tamien se squece de la fala ! Quando

Al furdes ha ver, talveç que steia muôrto !

Y assi yê, desgraciado d’aquel que se squece de la fala ! Hoije an die, ya nun hai que tener vergoña de falar al Mirandês. No ! Nun yê Purtuês que falamos, mas si la nuôssa lliêngua, segunda d’un peis bien pequerrico. Las Tiêrras de Miranda, antriçadicas antre dous armanos que quando éran pequeiños andavan al strellouço, éra y yê bien çfrente dal resto que you vie;

Al pastor lliêva an riba dals ombros ũa capa, ũa capa d’honra, yê assi que se diç. La tie, dal fruto dal tiêmpo passado culos chibos saca queişos a muntones. Y cu’la grana de la tiêrra fai pan qu’amassou y cuziu nun forno que ten mas de treziêntos años ! Quantas vezes los sous antes passados ferien esses jestos qu’eilla daprendiu de su’mai. Al Mirandês sta bien atadico cun esses traballos.

Soutro’die éra assi, mas d’eiqui an uns pouquechicos de dies, quando esses traballicos seran d’outros tiêmpos al Mirandês marchara-se. Marchar ? Y marcha pr’adonde ?

Nunca houvo an tod’al llugar

Ũa rapaza mas guapa !

Quien, drento de la su’capa,

Pudiera drumir, suñar !

[...]

You de ciêrto que studara

La ciência mas cumpreta

Ne las sues llanas pretas

Ne las tintas de la su’cara.

Si, home ! Pr’adonde ? Habera d’outros sitios adonde se fala Mirandês ? Pus sabes bien que no. Al Praino yê la tiêrra dals Mirandêşes, tal cum al Mirandês yê la lliêngua d’aquessa giente qu’ende vive ! Anton yê assi, que you te pido de falar-se essa lliêngua que te faloran los tous abos de saia y calças, los tous pais, y tod’aquessas pessonas que coinecieste. Fala Mirandês purque outros nun l’han de falar pur ti. Vai-t’alla, vai y diç-lo a outros, outros que faren cum tu... Y açpuis vuôlveras y cunteras-me !

S’aquel que para solo camina

Vos dezir :-Arrecula mucidade !...

Vós arrespondei-le (la reşon ‘l ansina):

-Nun se defan assi la Lliberdade !

You vos saludo alégre, antuşiasmado,

Moços, a quien caléçe un sol tan puro,

Valiêntes struidores dal passado,

Atrebidos suldados dal feturo !

Textos de Zé Lleite de Vasconcellos (José Leite de Vasconcellos) adaptados pur Tiêgui Albes (Thierry Alves).

Nace un forum Stur-Lleonês

Naciu hai algua semanas ya un forum Stur-Lleonês, pur ancuanto nun sta alla ningun Mirandês, mas cunividuvos ha alla participar y yê ua buôna maneira pra los Mirandêses de s'abriren un pouco pa llado de las Asturias... Y finalmiente ver que eilles tamien tenen la mesma lliêngua !!!
Teneis ua ligaçon ende a la dreita de la pageina :

http://lliasmir.mundoforo.com/

Llembrança de las nuites Alistanas...

De la squiêrda pa la dreita : Felipe, Tiago, Micaiel y Vitor.

Y tu... donde éres guapo ?
You... You sou de Cicuiro... Cicuiro de Aliste ! ;-)

Placa toponimica an Mirandês

Ende vos deixo outro eisemplo de placa toponimica an Mirandês
Fuônte de la Capiêlla de la Lluç, Costantin