21/11/15

La Raya an 1906

Eiqui vus deixu ũa parte dal llibru « As Terras de entre Sabor e Douro » de José Manuel Martins Pereira publicadu an 1906. Parte d’aqueste llibru fala de la nuôssa Raya, dals sous llugares.

Sabiêdes que naquesse tiêmpu Samartinu purduzie uns 1200 kilus d’un queiju de cabra de muita fama ? Pus eiqui teneis todu.

04/09/15

Na siêrra

Na siêrra, eilli yê la mas viêlla frunteira d'Ouropa. 



Reźultadu dal tratadu d’Alcañiças. Fui ende, nu cumbriu que s’outurdie cumimus ũa merendica a las horas de la céna. Que biên stubimus eilli. Calmus, sin un ruidu, antre’l die que s’iba y la nuite que s’acunchegaba a nos, las streillas que s’acendiên y lus llugares que mus apareciên cume ũas lliñas laranjas, loinje nals montes. Lus montes eilli staban todus, la Senabria, la Culebra, las muntañas de Salamanca, la siêrra de Mugadouru, la siêrra de Bornes y ya quandu mus apurcatémus, als très-quartus dal que teniêmus an frente lus uôllus, yêra toda Spaña ! Anté la chouriça yêra de Çamora y la cidra de Guipuzkoa…


Na siêrra, eilli turnarémus.

11/08/15

Las campanas y’l Pendon…



… dals moçus son ! Y fui assi que todu se passou nu passadu sabadu die 8 d’Agostu, die de la nuôssa fiêsta de Sant’Amaru.
Pu’la purmeira véç n’aquesta fiêsta saquémus al Pendon dal nuôssu llugar. Ya habie puri 60 añus que s’habie sacadu’l Pendon pr’ũa fiêsta. Nin lus nuôssus pais l’habiên vidu !

 Eloi a repicar


Assi que turnémus a fazer cume s’outurdie an Miranda. L’home fuôrte dal llugar, Oscar, agarrou la vara y ala qu’ala. Llugar arriba, eiras de Sant’Amaru, llugar abaixu, eigreija. Pu l’air qu’habie, alla lu llebémus, you puxandu pu’lus curdones. Nun sei se cumpri biên al miu traballu que yêra d’eiquilibra’l Pendon puxandu pu’las cuôrdas, mas alla spurmentei y gustei d’ir a’l lladu d’aqueste simblu dal nuôssu llugar. Pus miu abo y miu tiu-abo d’eiqui, yêran homes fuôrtes que tamiên lu lleborun quandu yêran nuôvus. Y fui purreiru, y cun muitu praźer pra mi lleba-lu cun Oscar.






Nu altu de Sant’Amaru inda fizu biên air. Mas al Pendon, atadu d’ũ ouliveira, alla veilaba, lluitandu pu’la vida nuôva que’l démus !

 Pendon y Pendonéta pu'la purmeira véç an Sant'Amaru !!!

 


07/08/15

Fiêstas de Cicuiru

Ala ! Las fiêstas de Cicuiru ya ampéçan llougu a la nuite. Purmeiru tenerémus la céna y açpuis muźica cu’lus Molineras. Ya mañana habera missa (c'ũa suspréźa) y a la nuite NV3. A partir de la méya nuite ũa moça que Dius sabe alla d'onde ven mas que ven a cantar, issu si y que se chama Teresa Carvalho stara tamiên cu nos.



Bon, de restu, la mellor fiêsta solu se puôde fazer cun aquestes fulanus qu'eiqui stan y ya ampéça llougu a la nuite !




29/07/15

Un die storicu an Miranda !


Al sabadu 11 de Juliu fui un die storicu pra Miranda. Ajuntorun-se eilli, pu’la purmeira véç, to’lus pendones de las Tiêrras de Miranda y inda mas d’alguns de las Tiêrras de Sayagu, Aliste y Llion !


 Oscar na viêspra purparandu'l pendon cun tiu Muizés y Alcides


Fui un die storicu pra Miranda, purque scalla pu’la purmeira véç, antrorun pendones de Llion n’aquessa cidade purtuéźa ! Y pur outru lladu purque fui la purmeira véç que s’ajuntaban tantus pendones an Purtual ! Fui ũa couźa méźmu mi guapa que gustariêmus de turnar a ver. Y fica claru qu’agora tocamus a nos d’ir a Llion cu’lus nuôssus pendones !


                           Pendones dal Prainu (retratu associaçon de pendones dal Reinu de Llion)



Mas agora deixai-me que vus cunte cume yê qu’aquesse die tan ampurtante viênu a aparcer. Al renacimiêntu dals pendones an Miranda ampeçou n’ũa tarde de Mayu de 2011. Staban Tere y Ricardo de passéyu pur Cicuiru y pedirun-me s’habie pendon an Cicuiru. You claru, nu’l sabie. Mas mie mai, que l’habie vidu ũa véç quandu yêra pequeiña, si’l parecie agora qu’habie dalgu assi. Fumus perguntandu a la gente de Cicuiru y pur fin si soubimus qu’houbu y qu’inda hai pendon an Cicuiru. N’aquesse die si que fiquémus cuntentus y Ricardo y Tere tamiên ficorun cuntentus y susprendidus cu’la çcubiêrta qu’habiên feitu !

                        Pendones de Llion (retratu associaçon de pendones dal Reinu de Llion)


Al pendon de Cicuiru staba arrecadadu baixu las reliquias de San Juan. Yêra tiu Muizés que trataba d’issu. Aton falei cu’él y fui assi qu’uns diês açpuis turnémus a saca’l pendon.

 
Tiu Muizés cu'l pendon an 2011 quandu'l turnémus a sacar




A partir d’ende, tiu Muizés pensou que serie mellor turnar a saca-lu pra que la gente saba d’él. Y assi se fizu. Purparou ũa vara nuôva y’l pendon fui sacadu pa’l sagradu to’lus añus de 2011 para aca, nu die de San Juan. Issu permitiu ver cume tenie que ser la vara pra que nun partisse cu l’air fuôrte que pur eiqui hai a la vézes.
Tiu Muizés fazie las varas, y Oscar yêra’l que punie’l pendon nu sagradu. Y alla iba él, mexendu-se pu’lus aires ! Que purreiru !

 Pendon llionés mi grande (retratu associaçon de pendones dal Reinu de Llion)


Mas ũa pergunta inda mus ficaba sin respuôsta. Y lus outrus llugares tamiên ténen pendones ? Scalla somus nos lus unicus ! A final nun yêramus lus unicus cu’l pendon, y inda biên ! Issu fui Alcides que’l demustrou n’ũ ambestigaçon qu’ampeçou ya l’impassadu. Y nistanticu achou d’outrus pendones y soubo d’outrus ya hoije zaparcidus. Fui ende ũa grande çcubiêrta pra nos todus. Purque lus pendones, ya staban todus squecidus ne las arcas de las eigreijas dals nuôssus llugares ! A nun ser scalla al pendon de San Juan de las Arribas, pu’l ménus lus nuôssus de la Raya staban squecidicus !
Tenendus aquessa çcubiêrta an manus, Alcides cuntatou l’associaçon de lus pendones dal Reinu de Llion y fui aton assi que s’urganizou aquesse die tan purreiru.

Parte dals pendones dal Prainu




Pus agora ya sabeis cume fui todu. Tengu que vus dezir que’l nuôssu pendon parecie’l mas altu carachu ! Cume tubimus que l’amarrar pra passar an baixu lus filus eilétricus nas rugas de Miranda !

Agora, quéda-me eiqui a dezir oubrigadu a Ricardo, Tere, tiu Muizés, Alcides, Oscar, Mariu, Paula, tiu Ribeiru y lus outrus moçus y ménus moçus qu’aparecirun naquesse die de fiêsta para ajudar a lleba’l pendon y la pendonéta pu’las rugas arriba de la cidade !

Pur fin deixu-vus eiqui dalgũas paiginas onde pudereis ver mas retratus y vidius d'aqueste fantasticu die :








08/07/15

Un die, ũa frole (7) : yêrba la rata

La yêrba la rata yêra ũa planta que la gente punie a'l pie las caźas pra fazer fugir lus ratus cu'l cheiru que ten. Pra mi, yê ũa planta mi straña purque yê tudica verde y quaisque nun se çtinguen las froles de las fuôllas cume pudeis ver aende nu retratu que vus pongu.




Al nome latin de la planta yê Euphorbia lathyris. Aquesse eiźemplu de planta achei-lu an frente la nuôssa antigua caźa las batatas. Cumequiêra que furun lus mius abos qu'eilli las sumiyorun.



07/07/15

Un die, ũa frole (6) : cherinchu

Lus cherinchus u als cherinches cume se diç an Samartinu que fui onde lus achei, crécen an sitius abandonadus, a'l pie de parécedes. Se quereis saber mas a cerca dal cherinchu teneis que buscar cu'l nome an latin que yê Chenopodium murale. La purmeira palabra ben dal grégu y quiêre dezir pie de parru, purque la fuôlla yê assi parecida. La segunda palabra pus quiêre dezir muru, issu ya'l sabeis.

Cherinchus inda nuôvus a crecer



06/07/15

La Rebéca

Pus... fui na fiêsta dal die trés de Mayu, qu'astañu an Samartinu queyiu nal die dous. Viênu la Rebéca. Ũa daquessas cantadoras que se vei agora na tervizon. To'lus moçus dal llugar staban tunticus pu'la ver. You ni'l fize caźu purque nin véyu muitu la tervison. 
La couźa yê que la rapaza nun yêra nada féya y aton furun todus a vé-la. Uns poucus de Cicuiru tamiên furun. Al fin de la fiêsta, alla andaban eilles a dezir : A Rebéca Rebéca ensina-mos a tua cuéca ! La rapaza de tantu lus ouvir amunou-se y nun ratu arrumou'l spetaclu pra puder scapar.
Mas rapazes... paréce que si vus oubiu y vus fizu la vuntade ! Purque you, s'outurdie pu'la mañana atupei aquissu na maçaneira an frente la caźa'l pobu :


...



18/06/15

Un die, ũa frole (5) : amores purfeitus

Eiqui stan eilles ! Als amores purfeites que salen an Abril ! Astañu qu'als de la yêrbicida nun passorun aquestas froles salirun pur to'ls llades. Yêra purreiru, staba todu biên guapu assi ! 



Y na tue tiêrra, cume que chamas aquestas froles ?

15/06/15

Un die, ũa frole (4) : lus burrachus

Cuntinu eiqui lu qu'ampecei l'añepassadu. Vémus hoije ũa frole que yê mi biên cuinecida de quiên yê buyeiru. Ancontra-se muitus nus cerradus. An Cicuiru yê cuinecida cume burrachu.Cumequiêra que tenera d'outrus nomes purende. Mas quales son na tue tiêrra ?



Burrachus nu cerradu d'Arlinda


Très burrachus...


14/06/15

Nin mas ũa fiêsta sin gaitas !



Atupei un reportaige biên buônu que fala de la gaita de fuôlles de la nuôssa tiêrra cun çtemuñas de to'lus atores ampurtantes que tenémus antretenidus cun aqueste eilementu fundamental de la nuôssa cultura. Eiqui lu teneis :


http://www.tsf.pt/Programas/programa.aspx?content_id=917979&audio_id=4619117

Que vus agrade !



13/06/15

Cicuiranu playboy

Indu you pu'la mie raya abaixu. Todu chenicu de proua an riba la mie motorizada. Iba you an cata de moças ! Rapazas buônas qu'hai purende...

You, de guapu que sou, an riba la mie mota


"Ay ! Mas que rapaç tan guapu !", "Mirai cume se rie !", "Mirai que mota tan buôna ten !", "Debe de ser mi fuôrte y mi ricu !". Si, indu you pu'la mie raya abaixu ya staba you a maginar cume las rapazas irien a falar de mi.

You, de guapu que sou, nu caminu las rapuźeiras cun toda la mécha !


Pus, indu you pu'la mie raya abaixu... la unica couźa qu'ancuntrei furun cañonas, cañonas y mas cañonas !!! Arre conchu que mala suôrte !!!



08/06/15

Al blog ya ten 8 añus !!!

29/05/15

Astañu nun houbu yêrbicida !

Anda qu'astañu als boubes la yêrbicida nun passorun pur Cicuiru a mejarar aquél liquidu de la muôrte. Cumequiêra que se perdirun !
Astañu hai froles, las cañonas y las vacas ya puôden paçer tranquilicas y nos puderémus turnar a fazer chas. Pus yê, "quem faz bem ao meu lugar" astañu nun passou y si yê verdade; fizu biên a'l miu llugar !

Amores purfeitus. Habie-ls an qualquiêra recantu de las rugas y caleijas... astañu.


14/05/15

La tabaféya chegou an Miranda !

A'l fin al cabu la tabaféya chegou an Miranda ! Ya añus que'l staba a pedir, que se respeite als nomes dal nuôssu fumeiru an véç de puner un nome purtués cu'l qual nun m'eidantificu. Inda me lembru que l'impassadu falei d'aquissu c’ũa cumercianta de la cidade y dixu-me que tenie rezon. Pur fin, achu que m'houbirun. Llebou tiêmpu, mas cume dezie'l nuôssu amigu Amadeu, issu siêmpre lliêba muitu tiêmpu.



Bon, pus agora ya nun hai vergoña an pedir y mercar tabaféyas an Miranda !

Renacimiêntu !



Hai que renacer, nun puôdu deixa’l blog assi que d’eiqui an poucu tiêmpu ya ten 7 añus ! Pus tamiên la naturéza ya renaciu. Deixou atras lus squecidus y vota agora lus nuôvus ! Vai sendu tiêmpu que faga you issu tamiên eiqui. 


Al renacimiêntu vémus cada añu cu’l Samarcus u la Lluç cume tamiên se vai chamandu. Paréce qu’aquessa feira mus saca de caźa onde stubimus arreñuladus a’l llume durante to l’Inviêrnu ! A seguir furan las fiêstas de Samartinu cu’la Rebeca (ya iban dezindu uns burrachus “Ah Rebeca Rebeca Rebeca ensina-nos a tua cuéca !” Solu cun issu ya pudeis ver que vamus listus pa’l branu ! Tamiên furan las fiêstas dal San Juan de las Arribas cu’l passéyu. Las fiêstas marcan al tiêmpu a mode d'un reloiju, dan las horas a todus nos. Pra mi ya son las horas de screbir eiqui !




Si aca stamus de vuôlta, spéru que’l traballu nun me vai a pegar muitu la cabéça y que you vus puôda vutar eiqui ũas cuôntas cume gustabades antes de ver !

14/02/15

Feira dal fumeiru an Miranda !

(Retratu sacadu de l'Anternéta)

SI ! NOSOTROS TAMBIEN PODEMOS IR A LA FERIA DE LOS CHORIZOS EN MIRANDA YA !

09/02/15

Çufinu de lliêbre

Çufinu de lliêbre yê'l nome que'l daba'l miu abo a las maçanas qu'eiqui védes. Son mui buônas, cun çumu y biên açucradas. Yê ũa de las variadades que cullimus an Cicuiru. Nun sei'l nome d'aquesta maçana an latin u an inglés. Se dalgun de vos sabe fazi-me'l favor de puner ende'l nome pra you tener mas anfurmaçones.

Las maçanas vistas de difrentes maneiras

08/02/15

Onde fica ?

Aton ! Onde fica'l campaneiru esse ? Ah ! Catanu ! Naide sabe ? Puje aquesta pergunta nu blog ya fai biên méźes y naide soubu me-lu dezir pur ciêrtu. Muitus dezirun que yêra'l de Cicuiru, d'outrus que me dezirun que serie pur ende (cumequiêra !)



Pus... mius amigus... Yê'l campanairu de l'eigreija de Custantin ! Pus si home !



04/02/15

Al Carochu anda de chaça !


Al Carochu anda tunticu ! Al Pai Natal truxu’l ũa chaça y anda tode cuntentu cu’eilla ! “Ché ! Ché !”, chamou-me quandu iba pra Mubeirus.
Vi-l’onte y dixu-me que lus checulates dal Japon son mi buônus. Que las rapazas d’alla son mi pimponas y qu’un die l-da ũa bellaraça y marcha-se de chaça anté’l Japon ! You ya’l dixe que p’alli van a gustar d’él !

Mas yê que de chaça... nun sei s'alla chegara !!!



09/01/15

Al Carochu pediu-me deñeiru !


Al Carochu pediu-me deñeiru... y fui ũa japonéźa que'l dou ũa caxa de checulates !

07/01/15

Canta lus Reis



L’añepassadu pensei n’ũa cantiga pra cantar pu’las rugas de Cicuiru nal die de Reis… mas açpuis nun la cantei. Apénas la screbi y eiqui vus la deixu !



DIE DE REIS

Naqueste die Santu
Venimus-vus a canta lus Reis
Naquestes diês d’auga
Nosoutrus nun venimus de l’Ouriente
Mas de la frauga d’alla baixu !

Dal llume’l nuôssu curaçon
Furgémus pra vos aquesta cançon
Solu de llingua, ya sin acurdion
Se mus quereis dar un çbicu de pan
Ya un bunchu de cha de curteilla

Nun vus fagades mui furinga
Nun vus squéçades de la pinga !
Se la źmolica vus yê peźada
Aton sali de caźa
Cu nos a dar ũas riźadas !

Die 7 de Janeiru 2014, Portu.