30/06/08

Quemer a la Lluç : D’antes y hoije.

Quemer y buer a la Lluç yê tradiçon ! Cunforme se tenga ũas crouas pra gastar cu’la familia y lus amigus, siêmpre se come biên !

Cicuiranus cun fame (Lluç 2007)

A mi tamiên m’apetéce ir a quemer a la Lluç. Tamiên nun me custa nada, yê siêmpre al miu grande amigu Oscar que paga y que Dius l pague a él pu’las cenas qu’alla angulipamus !
Gustaba d’ende vus aperźentar algũas fetugrafies que ya pus nal cadernu, mas achu que valie la péna de las vuôlver a ver assi juntas desta maneira.

Ajuntamiêntu de Cicuiranus (Lluç 2008)

Essa yê de 1966 y reperźenta las mulliêres que faziên las sptadas de carne Mirandéźa. Hoije an die, la couźa nun mudou muitu. Al llume ya nun se fai nal suôlu, mas nun cacharu metalicu adonde puônen alla las braźas.

Nal pote y a la braźa (Lluç 1966)

Mas issu anté depende (parece que stou a oubir a Dalfin :”Quei ? Quiês un pende ?) de las pessonas purqu’hai las qu’inda fazen l llume nal suôlu, cul guiźadu nal pote ! Si home, cum d’antes !

Nal pote y a la braźa (Lluç 2007)

Ũa couźa d’antresse ne la feira, yê las relaçones antre Purtuéźes y Spañoles; La meyor parte dal tiêmpu quandu mus coineçémus vamus a tumar uns copus juntus, quemer ũas cachuôlas y a falar dal que se cuônta pur’ende. La lliêngua uźada yê siêmpre l Spañole purqu’an Aliste ya nun se fala Llionés. Y nun sei purquei mas somus siêmpre nos que tenemus que mus sfurçar a falar la nuôva lliêngua d'eilles !

Purtuéźes y Spañoles quemendu a la meźa (Lluç 1966)

Mas generalmiênte quandu las pessonas nun se coineçan nun se misturan. Talveç d’antes la ourganizaçon de las couźas de la feira pudie ser defrente fazendu que meźmu la giênte d’un lladu y d’outru de la frunteira que nun se coinecie pudie quemer junta. Hoije achu que ya no.


Purtuéźes a la meźa (Lluç 2008)

Tamiên la vida yê defrente, hoije la frunteira fica mas marcada an parte pur cauźa de las mellories an tercomunicaçones qu’acaba pur puner defrenças adonde antes nun las habie (lliêngua nuôva, patriotiźmu nacional,...). Y ne la generaçon mas nuôva se nun fueran abituadus a ir al peis vezinu, pus nun van, y las relaçones nun son tantas.

Nals dies buônus de la feira, astañu pur’eisemplu, houbu bastante pessonas que beniêren cu’la merenda. La curjidade fui que solu lus Spañoles habiên llebadu la tal quemezaina y anté teniên tiêndas y todu, andaban biên purparadus que vus al digu you !
Familia Spañola quemendu la merenda (Lluç 2008)

An relaçon a la culinaira Lluzeira yê de la mas simples que puôde haber, mas cu’lus mas buônus predutus de la raya : carne assada, fumeiru, vinu y trigu.

Nun hai que s’al diga... quemer a la Lluç da siêmpre gustu ! Qu’ende nun se come so dal pratu !!!

23/06/08

Tenen cadernu !

Agora ya quiên quiêr ten cadernu. Solu yê ancuntrar ua capa, uas pageinas y ya sta ! Yê l que faziêren an Samartinu. Mas nun gustu dal cadernu aquesse... Quei sou fidalgu ? No, mas yê qu'al cadernu sta a l'eimaige dals que stan alla, ou seya sta an Purtués, talveç cun uas palabras eiqui y aculla an Mirandés...
Hai, hai puliticus, mas stan mal repartidus... adonde stan lus outrus ? Lus verdadeirus puliticus ? Han ? Nun oubu...

06/06/08

Quiên fui a la Lluç viu !

Ya vai ũas sumanas que you andu ende querendu puner ũas fetugrafies de la feira de la Lluç que tamiên chamamus feira de San Marcus, mas nun hei tubidu muitu tiêmpu y pra mas querie puner un vidiu cum l'añu passadu fiç so que tengu un purblema cul purgrama que fai essas couźas !



Las pessonas qu'habie a la missa de la Señora de la Lluç



Cheguei de Paris nal die de la feira, assi que so fui abaixar dal carru y toc'andar pur aqueilles curales que faziên tode las tiêndas eilli puôstas. Tanta giênte qu'habie naquele die ! Eran cum furmigas ! L mas qu'habie éran spañoles qu'habiên aprubeitadu l die biên buônu que staba pra merendar llougu al pie dal monte.




La giênte qu'alla habie !



Ũa veç mas tube al praźer de ver al gueiteiru Sanabrés que siêmpre gustu de l'oubir tucar. Toca mui biên y un die chegou m'a dezir qu'habie tubidu purblemas, mas que lus pulmones inda lus tenie biên rijus, assi qu'él cuntina a tucar !




Al gueiteiru Sanabrés


Astañu nun cheguei a ver lus Llionéźes que vendiên doces biên buônus que you l'añe passadu habie llebadu ũa sacada pal Portu y biên que me gustoran. Tamiên nun cunseguie ver passonas de Bilbo nin de Donostia cum l'añe passadu. Mas giênte si habie ! Y biên mas que las outras vezes !



Castiêlla... y Llion !


Mas so quandu m'apérécen an frente de mi dues rapazas a preguntaran-me se you yêra Thierry. You a dezir que si, eillas m'arrespondan o teu blog é o maximo ! Pudeis pensar que si fiquei mui, mas mui cuntentu cul qu'eillas m'habiên dizidu.


Meźmu an riba de la frunteira !


Mas al tiêmpu tamiên llougu se fui. Cum agora ya fica a ser tradiçon cumprei ũa navalla de Palaçuôlu y un cantaricu d'aqueilles de Muveirus. Un d'aqueilles cantaricus qu'açpuis de chenus d'auga assuprendu alla botan ũa muźica que parece un paixaru. Ya me deziêren de spurmantar cun auga ardiênte que dizen qu'açpuis l cantaricu anté se pon a cantar !!!


Vandendu queiju... nal parque natural dal Duiru !



Quandu ya quaisque la feira s'habie acabadu, cum tamiên ya yê tradiçon Oscar cunbiduo-m'a mi y a Urlandu pra quemer ũa buôna puôsta a la Mirandéźa, meźmu eilli nũa taberna de la feira.


Pan y chicha, chicha y pan... ũa buôna puôsta maźyê !


Alcinu tamiên querie quemer cun nos, mas nu'l deixémus se no nun mus chegaba pra todus ! Açpuis ya so éra striba-se nũas cayatas pra cheguar a caźa purque cu'la barriga chena y la cabéça a las vuôltas cul binu... digus-vus you que nun yê assi tan façél d'ir pula raya arriba anté Cicuiru !

Las cayatas qu'uźémus pra vuôlver a Cicuiru !


Gustaba de deixar ende ũa eideya pa'lus mardomus de la fiêsta purque serie buônu qu'eilla fussa feita an culaboraçon cun pessonas de Muveirus. Pus la fiêsta nun yê so de lus Custantineirus... dantes tamiên éra Cicuirana ! Purque nun puderie ser tamiên de Muveirus ?


Y assi se fui passandu l tiêmpu agora ya solu yê sperar pa la que ven, ir alla y coinecer inda mas pessonas, falar cun mas giênte.

05/06/08

Cum you siêntu las faltas de ti !


Tengu ganas,
siêntu las faltas,
faltas que me fazes.
Un café, la mie chaça y you an frente dal caminu... al restu que s'afoda !

Chamadeirus de Cicuiru

Huôrtas de Cicuiru

Fui publicada ũa lista cumpreta de lus chamadeirus de Cicuiru, pudeis la cunsultar ende.

04/06/08

Un rock pal festibal de la cançon Mirandéźa

Pensei qu'un rock pal festibal de la cançon Mirandéźa serie buônu. Anton adaptei ũa cançon de lus "fastball", ũa que se chama "fire escape". Tenie uns 15 añus la purmeira veç que l'houbie. Yêra la purmeira veç qu'houbie rock Americanu !

Yêra nal tiêmpu an que la MTV inda passaba a ser un canal de tervizon... qu'hoije yê so ũa grande cagada toda burrada qu'ende sta... biên an fin !


Fastball

Adaptei la cançon mudeficandu algũas palabras, cunserbandu outras, mudendu lus sentidus. Gusterie muitu qu'haba un grupu que la querga cantar pal festibal !

Inda stou a screbir outra que d'eiqui an poucus die punerei ende tamiên.
Mas pur'anquantu eiqui vus fica essa a ver se vus gusta la nuôva letra:


La lluç que t'allumbrara

You nun quiêru ser doutor,
perfiru andar de trator,
you siêmpre querie ser llabrador.

You nun sei de qual lladu hei de star,
You nun sei pur'adonde hei de ficar,
Y you nun sei
Nada de ti.


You serei la lluç qu'allumbrara al tou Prainu scuru,
Talveç nun seya quiên tu stas a spera.
Mas puôdu ser you meźmu,
Que mas quiês ?

You nun quiêru coincer tu mai,
Dizen que yê ũa tonta que nun hai,
Ya nin quiêru saber dal tou pai.

You nin sei l qu'ancuntrei,
Nin defrençu al ciêlu dal suôlu,
You nin sei par'adonde hei de ficar,
You nin sei,
Nada de ti.

You serei la lluç qu’allumbrara al tou Prainu scuru,
Talveç nun seya quiên tu stas a spera.
Mas puôdu ser you meźmu,
que mas quiês ?

You serei la lluç qu’allumbrara al tou Prainu scuru,
Talveç nun seya quiên tu stas a spera.
Mas puôdu ser you meźmu,
que mas quiês ?

Mas puôdu ser you meźmu, que mas quiês ?
Mas puôdu ser you meźmu,
que mas quiês tu ?

Tiêgui Albes, llibra adaptaçon de Fire Escape, de Fastball.



Pudeis ver al vidiu de la muźica ende:

http://www.youtube.com/watch?v=iavCZ39bzCw