Perdidus an tiêrras Alistanas !

Hai ũa tiêmpuradica atras you y Oscar fuemus a dar ũa vuôltica pur Aliste. De la Lluç, que fai frunteira, passemus al pie de Muveirus y d’eillie anté Arzelleira.
Al que you nun digu yê que mus perdimus açpuis de Muveirus y ya nun habie maneira de saber adonde stabamus ! Solu éran xeixagales, piñus y urzes pur tod’lus llados !

So quandu Oscar me ven alla cun essa : « Al miu termoble tamiên fai PS ! »

You : Quei ? Tenes alla dalgun partidu puliticu metidu ? Ya que yês assi tan furetu pa la quemezaina siêmpre pensei qu'éras d'un partidu meyu central cunserbador...

Oscar : No ! Yê l PS pra sabermus adonde yê que mus metimus !

Al purblema éra que stabamus metidus nũa ourriêta chenica de yêrbotas altas y nun se cunseguie tener lligaçon culs satlitus dal PS !
Stabamus nun sitiu que talveç l’home ya nun punie alla lus pies ya mas de trint’añus ! Que merda ! Tal digu you !
Tubimus que chancar un rigueiricu que pullie passaba y chubir pr’un altu que nin te digu cum staba aquiêllu… tode chenu de pedricas de la merda y outras mas finicas que parcien llaminas de Palaçoulu ! Alla chubimus l’altu culas chaças a l’ombru.

Vista de la siêrra d'Arzelleira

Y quandu arriba chigemus ya daba pra ver mellor pur’adonde habiemus passadu…
« Al miu PS ya funciona ! » diç Oscar…
« Stamus al pie d’Arzelleira, pus dé mus ũa vuôlta de las ostias ! Nal meyu d’aquesses piñus quiên alla bie adonde ibamus ! »

Y assi fui… achemus outra veç al nuôssu caminu… tamiên ya nun éra siên tiêmpu que tenie you ũa fame !